జన గళం తిరువూరు డెస్క్: ఎన్టీఆర్ జిల్లా తిరువూరు నగర పంచాయతీ/మున్సిపల్ చైర్‌పర్సన్ అభ్యర్థిత్వం కూటమిలో తీవ్ర అంతర్గత సంక్షోభానికి దారితీసింది. తిరువూరు మున్సిపల్ చైర్‌పర్సన్ స్థానం బీసీ మహిళకు రిజర్వ్ కాగా, స్థానిక ఎమ్మెల్యే శ్రీ కొలికపూడి శ్రీనివాసరావును ఏమాత్రం సంప్రదించకుండా వేరే ప్రాంతం నుంచి వచ్చి కుల ధ్రువీకరణ పత్రం పొందిన వ్యక్తికి (జనసేన తొలి జాబితాలో పి. మాధవి పేరును ప్రకటించిన నేపథ్యంలో) టికెట్ కేటాయించడంపై వివాదం రాజుకుంది. స్థానిక ఆది బీసీలకు కాకుండా ఇతర వర్గాలకు అభ్యర్థిత్వం ఇవ్వడంపై ఎమ్మెల్యే తీవ్ర ఆగ్రహం వ్యక్తం చేస్తున్నారు.
ఈ క్రమంలో ఎమ్మెల్యే కొలికపూడి శ్రీనివాసరావు పెట్టిన వాట్సాప్ స్టేటస్ నియోజకవర్గంలో పెను సంచలనం సృష్టిస్తోంది. అధికారికంగా ప్రకటించిన అభ్యర్థికి వ్యతిరేకంగా.. ఆది బీసీ వర్గానికి చెందిన స్థానిక డాక్టర్‌ను చైర్‌పర్సన్ అభ్యర్థిగా పోటీకి దింపుతున్నామని, రేపు జరిగే నామినేషన్ కార్యక్రమానికి కార్యకర్తలు, ప్రజలు భారీగా తరలిరావాలని ఆయన నేరుగా పిలుపునిచ్చారు. ఎమ్మెల్యే పెట్టిన ఈ స్టేటస్‌తో తిరువూరు కూటమి రాజకీయం ఒక్కసారిగా వేడెక్కింది. అధిష్టానం నిర్ణయాన్ని కాదని ఎమ్మెల్యే సొంత అభ్యర్థిని బరిలోకి దింపుతుండటంతో తిరువూరులో తీవ్ర ఉత్కంఠ నెలకొంది.
